نصائح قبل اما تشترى لاب

اهلا بيكم في متجر ابو علي
قبل قراءة الموضوع فضلا إنضموا لجروب متجر ابو على هيفيدكم جدا
بالعروض الحصرية والمعلومات المفيدة
https://www.facebook.com/groups/abo.ali.markteting/

او من متجر أبو على
في الموضوع ده شوية توجيهات عشان متخسرش فلوسك وانت بتشترى
ازاي اعرف ان كان بيتضحك عليا في الحاجة اللي بشتريها ولا لأ
الفرق بين اللابات الاستيراد والجديدة
الفرق بين الاجهزة الكور و ال amd
الفرق بين كروت الشاشة النيفيديا والانتل
هل الجيل بيفرق ولا لأ
ازاى اختار اللاب اللي يناسبني
أشترى لاب ولا كيسة؟

اولا ازاي اعرف ان كان بيتضحك عليا ولا لا
اول حاجة هتلاقي اعلان اللاب مش كامل دايما الوصف الناقص هو عيب اللاب
زي مثلا تلاقي مكتوب الهارد والرامات وخلافه ومش مكتوب حجم كارت الشاشة الفعلي ساعتها اعرف انك بتلبس اللاب
بالنسبة للسعر افضل حاجة انك تدور علي اللاب علي النت وتعرف متوسط سعره عشان تعرف السعر اللي انت شارى بيه غالي ولا رخيص
الضمان حاول تشترى من حد انت متوسم فيه انه مبيضحكش عليك مفيش مانع لو معندكش خبرة انك تسأل حد معرفة عن مواصفات اللاب المعروض عليك وهو هينصحك بالصح
ان البائع ميدكش ضمان علي اللاب
ثانيا الفرق بين اللابات الاستيراد والجديدة
الاستيراد ارخص في السعر عن الجديد ودي ميزة الاستيراد انضف في الخامة عن الجديد الفرق ليك انت كمسخدم انك مش هتعرف تكتشف ان كان اللاب فيه عيب ولا لأ عكس اصحاب الشركات عندهم فنيين بيقدروا يكشفوا علي اللابات وبيعرفوا ان كان فيها عيوب ولا لأ قبل اما يبيعوها

ثالثا الفرق بين الاجهزة الكور وال amd
كتير جدااا انزل اعلان واكتب نوع البروسسر amd يقوم المشترى سائل السؤال التقليدي اللاب كور لي كام؟
السؤال ده غلط لان دول شركتين مختلفتين تماما زي مثلا ينفع اقولك الايفون الاندرويد بتاعه كام؟
نفس الفكرة شركة انتل هي الشركة اللي بتصنع بروسسرات الكور اما شركة ati هي الشركة اللي بتصنع بروسسرات ال amd
عشان كده احنا لما بنكلم العميل بننزل لمستوي فهمه وبنقوله البروسسر ال amd ده بيعادل بروسسر كام في الكور
زي مثلا كاميرا الايفون ١٢ ميجا بيكسل تعادل كاميرا ٣٢ ميجا بكسل قي الاندرويد
الفكرة بنقولكم قوة البروسسر ده عامل زى قوة انهو بروسسر في الكور
عموما انت كمستخدم استحالة تعرف البروسسر ال amd اللي معروض عليك يعادل كور اى كام الموضوع كله راجع لضمير البائع معاك

رابعا الفرق بين كروت النيفديا وال amd
بالنسبة للمستخدم العادي عامل زي الفرق بين مثلا سامسونج وشاومي مثلا المستخدم العادي مش هيحس بفرق وان حس هيبقي فرق بسيط مش مؤثر زي مثلا جودة الكاميرا
الكارت النيفديا اعلي في الكفاءة بحاجة بسيطة لكن بتبوظ بسرعة ولو باظت اقل تكلفة هتدفعها مش هتنزل عن ٢٠٠٠ جنيه
اما ال amd فا بيستحمل ويعيش فترة اطول
النيفديا اعلي من ال  amd بحوالي ١٠٠٠ جنيه فرق كبير جدااا

خامسا الجيل واهميته
بمثال بسيط عشان تشترى لاب جرافيك اول حاجة بتدور عليها ان كارت الشاشة يبقي ٢ جيجا او بحد ادني اوي ١ جيجا لكن لو ٥١٢ مبتشتريهوش
هنا بييجي فرق الجيل لو عندك لاب مثلا كارت شاشة ٥١٢ جيل سادس فيما فوق اعرف ان اللاب ده هيشتغل جرافيك معاك
لان جيل البروسسر بيفرق في كفاءة كارت الشاشة
فا الجيل بيفرق في سعر اللاب ممكن ٢ لاب نفس المواصفات بالظبط ده مثلا كور اي ٧ جيل اول ولاب كور اي ٧ جيل ثامن تىاقي الفرق بين سعر اللابين ٢٠٠٠ جنيه
عشان الجيل بس
فا الجيل مهم

سادسا ازاي اختار الااب اللي يناسبني
هختصر عليكم المسافة بمثال
ممكن يبقي معاك تشترى شقة ١٠ غرف نوم لكن هتستخدم غرفتين ٢ يبقي دفعت حق ٨ غرف وخسرت فلوسهم علي الفاضي
كذلك اللابات حدد انت هتستخدم اللاب لايه وبلغ التاجر باستخدامك عشان يحددلك ايه اللي يناسب استخدامك
يعني متبقاش اخرك افلام واغاني ونت بس وتروح تشترى لاب ب ٥ او ٦ الاف جنيه وانت لاب ب ٢٠٠٠ يكفيك وزيادة

سابعا أشترى لاب ولا كيسة؟
بص ياسيدى كلامى هوجهه الاول للناس بتاعة الافلام والاغانى
لو انت من النوع ده وملكش فى الالعاب والجرافيك فا انت حر تشترى لاب او كيسة ال 2 واحد والاختيار يرجع هل انت هتتحرك بيه ولا لأ بس خد بالك
انت هتشترى لاب كارت شاشة انتل بما انك مش هتشتغل شغل جرافيك ولا العاب ولو هتلعب العاب خفيفة يبقى تشترى لاب كارت شاشة انتل 4600 ده هيشتغل معاك العاب كويسس

نيجى بقى للناس اللى هتشتغل جرافيك دول نوعين
نوع بيشتغل شغل تصميمات جرافيك يعنى شغل تصميمات بس .. اقوله لو انت هتكون متنقل اختار اللاب لو هتعمل شغلك فى مكان ثابت اختار الكيسة
طب لو انت هتلعب العاب جرافيك هقولك إختار الكيسة ومتختارش اللاب
ايه السبب؟
السبب ان اللابات الجرافيك بتضرب كروت شاشة بسرعة لان هى فى الاساس مصممة لشغل التصميمات للمهندسين والمصممين هى فيها كروت شاشة عشان كده لو استخدمتها كدة هتعيش معاك
لكن مش مصممة إنك تفضل تلعب عليها احنا عشان بنشوفها جرافيك فا بنشغلها العاب وده غلط لانها بتسخن جداااا مع الشغل العالى وده بيخلى رجول شباية كارت الشاشة بتفك ودى مبتتصلحشش
لو هنشغل العاب يبقى الكيسة أفضل بكتير عكس اللاب هيبوظ منك بسرعة

اخيرا ده اللي جه في بالي اكتبهولكم دلوقتي ولو في حاجة افتكرتها هضيفهالكم واي استفسارات ممكن تبعتولي علي الفيس